EKUNKILILO KOSHIGWANA SHANDONGA NOSHO WOO KEZIMO LYAAWA YA NDONGA MEKWATELO KOMEHO LYAKUKU SELMA GWANANDJOKWE, MOKUKEELELA EVUNDAKANO TALITSIKILE, PASHINYOLWA SHA GWANANDJOKWE MOSHIFO SHO SUN 05 MAR

March 13, 2018, 10:22am
1. Uuyelele tawu holoka MOSHIFO shino kawunasha noshigwana nenge noshilongo sha Ndonga, ashike owunasha nezimo lyaawa nowopaumwene, ngaashi naana  gwanandjokwe eshi yelitha ye mwene paka paragrafa okatitatu moshifo. 
 
2. Oshinyolwa shino kashinasha noku eta ombili mondonga, ihe otashi hwahwameke uutondwe niita pokati koshigwana shAandonga nezimo lyaawa, pokati komalenga gomukwaniilwa nOmukwaniilwa yemwene, nosho woo pokati komalenga gOmukwaniilwa naamboka ya yuguko noku umbako elelo lyOmukwaniilwa koshipundi. Uukwatya mbono owo wa kala tawu henukiwa monakuziwa konima yoshiningwanima. 
 
3. Pauyelele tawu holoka moshifo muno naamboka wuli moshigwana pantseyo ndjoka yilipo, itawu tsu kumwe. Oshoka gwa nandjokwe keshi Omunashipundi pamwe nOmukwaniilwa,  Gwanandjokwe okwa kalelapo ashike okangundu ha kagama kombinga yomunyekadhi, ano ho ka langeka mbo ya umbuko elelo lyOmukwaniilwa koshipundi. 
 
4. Okangundu ka gwanandjokwe oko woo taka etitha evundakano mOndonga, shaashi oko kali ka  lundulula ombapila yetokolo lyOmukwaniilwa (2012) nosho woo lyezimo lyaawa (Minute) ndyono lyali lina oku shayinwa  momasiku ga 03 ga January 2018, etali ponyo, nosho woo momasiku 10 ga January 2018, mono lya li woo lya ponyo omolwa uulingilingi nomakengelelo gali taga kambadhalwa kuningwa. Shono she etitha opo aakiintu yomezimo lyaawa kaa ya yemowe moonkundathana dhezimo pakuninga omatokolo moshikumungu shOndonga, mono mwa kwatelwa gwanandjokwe. 
 
5. Omatokolo gelelo lyOshilongo sha Ndonga ihaga ningwa kezimo lyaawa, ihe ohaga ningwa komalenga mekwatelo komeho lyOmukwaniilwa.  Nomolwaasho ezimo lyaawa kali na uuthemba okuninga omatokolo pamuthika gwOshilongo.
 
6. Omatokolo ngele taganingwa pamuthika gwOshilongo ohaga ningwa komalenga ndele ha kaawa. No ihaga ningwa koohandimwe nenge monanguwi, ashike ohaga ningwa momeho goshigwana nenge gomalenga omanene. 
 
7. Pakatendo oka ti 9 nosho woo oka ti 10 pampango yomalelo gopamuthigululwakalo onti 25 yomo 2000, Omukwaniilwa iha ningi etokolo pauyemwene oye awike, ihe oheshi ningi mekwatathano  nomalenga ge. Ano kokutya uuna pena oshikumungu tashinyenge omalenga oku tokola, Omukwaniilwa opo ha kutha etokolo konima sho apwilikina noku konakona nawa oshikumungu shoka. 
 
8. Pashinyolwa shino, otashi tolokana iilalo yoshigwana, nokunyana omalenga gOmukwaniilwa nosho woo oku tumbaleka mboka yu umbuko elelo lyOmukwaniilwa. Ngaashi naanaa omadhina gayo taga holoka moshifo, nonando oyendji yomezimo lyaawa mwakwayelwa gwanandjokwe oyeshi zlkoleke kutya; eumbemo lyomalenga gomukwaniilwa melelo hamolwa ando gena sho ganinga, ihe oshinasha nomulanduli gwOmukwaniilwa. Ano shaningwa kwaambono yeli ompinge netokolo lyOmukwaniilwa sho uulike omutekulu gwe  Shuumbwa Fillemon Nangolo, onga omulanduli gwe. 
 
9. Oshinyolwa shino otashi tolokana woo noku ehameka oshigwana, shono shili shayemata omolwa iiningwanima mbyono ya ningilwa Omukwaniilwa gwasho, nosho woo monkalo moka eli sigo onena, mwa kwatelwa woo ekeelelo lyoshigwana oku kwatathana oku talelapo omukwaniilwa, nOmukwaniilwa sho afa eli muupongekwa. 
 
10. Tse onga aakwashigwana Aandonga otwa kala twa mwena, konima sho twa kundathana naakuluntu noku ipa omayele ngono ga kwatelamo oonkundathana dhezimo lyaawa, noku ninga omakonakono miinima yilwe. Otwa li twa tseyithile woo oshigwana shi ngungumane, konima sho sha li sha tindindilwa oku mona Omukwaniilwa gwasho. Mpono sigo onena tashi pula kutya; ano olye ali eshikeelele oku ka talelapo Omukwaniilwa gwasho nomolwashike?
 
11. Shino oshafa shayela kutya nani ezimo lyaawa olyo nani lyakutha omalenga miilonga yelelo lyOshilongo noku longitha edhina lyOmukwaniilwa?
 
12. Oshigwana otashi indile noku pula woo Kuku gwanandjokwe opo iikaleke kokule niinima yoshigwana pa shikumungu shOndonga, nongele ota popi iinima yezimo lye, inakwatelamo oshigwana, nokakuna ngo taka yamo moohapu dhayo. 
 
13. Otaku kunkililwa woo natango kutya, aakwashigwana oyendji oya yugwa noyena omikundu  inaadhi potokononwa sigo onena, omolwa evundakano ndyoka lye etwa kwaamboka yeshiwike kutya oyo ye eta uupyakadhi.
 
15. Tse Aakwashigwana otwa li twa gandja ompito ku Tatekulu Shuumbwa opo a pwilikine oka ngundu ka gwanandjokwe nayakwawo kutya oya hala shike. Ngele ombili kaayina kohi, ta tsikile oku ninga kehe shoka tashi opalele oku galulila oshigwana ombili nosho woo mOndonga ayihe koonono. Ihe ngele oyena oshimbilikulyandje, ina tsikila noonkundathana dhatya nga. Tse tu ye komeho naashi twi ipyakidhila nasho.
 
16. Ano nashi kale shayela ngeyi kutya, Oshigwana oshina nale omalandulathano gasho nomatokolo gasho pamuthika gwonkalo ndji yi lipo, pamulandu gwomuthigululwakalo gwOshilongo shaNdonga.  
 
17. Ngele ezimo lyaakwaniilwa olya hala oku eta elandulathano nombili mOndonga, oonkundathana adhihe dhinasha nOshilongo shandonga odhina oku ningwa mekwatathano naakalimo yamo, ano aakwashigwana yAandonga. 
 
18. Koshigwana ashihe sha Ndonga, ethimbo ndyono lya li lya gandjwa kezimo lyaakwaniilwa ya Ndonga yatse kumwe miinima yezimo lyayo olya pwako, onke kaleni mwashoka okutsi kutya uunake taku kala oshigongi shaandonga ayehe, notamu ka lombwelwa woo mu ete iihokolola yeni kombelewa yi pwilikinwe. 
 
Omukulu gwonale okwa tile, omapaha ihaga helelwa, ohaga li aantu! Sho oshilongo ihashi liwa omudhimba-holeka.
 
Omushangi: 
 
Pendapala Nakathingo na Kennedy Iilonga,
Aakwateli komeho yOshigwana shAandonga moshikumungu shOndonga. 06/03/2018