Oshikandjo Ondangwa.

August 29, 2013, 10:24 am


Oshikandjo Ondangwa.

Oyendji ngele ta ku popiwa Ondangwa ohatu ipula owala, oondjugo oontokele nehumokomeho ndyoka tu wete nena, noha tu yi tala ko onga ondoolopa ashike. Pandjokonona nopalelo lyopamuthigululwakalo Ondangwa oyo oshikandjo shomiikandjo yomelelo lyoshilongo shOndonga ndyoka li li mewiliko lyOmukwaniilwa nomalenga ge. Oshikandjo sha Ndangwa osha pala ondjila noshilongo Shuukwambi muuninginino, Uukwanyama ponkotso yokuumbangalantuninginino, Oshikandjo Oshuushe muumbanglalantu, Epale muumbangalantuzilo noshowo Onethika (Omulondo) muuzilombugantu. Oyina omikunda dhi li 181 ndhono dha topolwa miipundi yi li 11. Iipundi ongaashika ne Olukonda, Onamulunga, Oshikondiilongo, Uuthikilo Okatha kOmomugulu, Omulamba, Omaalala, Onanyoka, Omale, nOmpunda.(one Missing)
Pandjokonona Ondangwa oyo katokote mOndonga, oshikandjo osha tana muunene pethimbo lyelelo lyomukwaniilwa Sheepo Sha Namene ngoka e li gumwe gwOmakwaanilwa ye vulithe pu ya heyali mboka ya dhike Oombala dhawo moka, nokulelela Ondonga mOshikandjo sha Ndangwa. Ohaku tiwa anuwa oshilongo ohashi lelelwa kolukadhi, noshikandjo sha Ndangwa oshili lela nkoka, onkene aakwaniilwa oyendji okuza Omukwaniilwa Nangolo dhAmutenya, Kambonde ka,  Kambonde ka Mpingana, Martin Kadhikwa, Sheepo sha Namene, Martin Ashikoto, Shuumbwa Elifas, na Tate Omukwaniilwa Kauluma oya lala Ondonga mOshikandjo sha Ndangwa. Aakwaniilwa woo akiintu ooyina yoshilongo Ngaashi Kuku Namupala gwaNangombe na Kuku Mutaleni Gwampingana nayo oya kala nomauwa gawo moshikandjo shika.

MOshikandjo omo woo mwa kala ombelewa yOshilongo, omathimbo gamwe oya li mOkaloko metonatelo lya Amushanga Mwifi, sigo ye ya mondoolopa ya Ndangwa mo mwene, Mewiliko lya Tate Julius Nghaikukwete. Ondangwa oya kala mewiliko lyomalenga ngaashi, Fillipus ya Shilongo, Johannes Mbokoma, Tonata Amakali nonena Tate John Nangombe ya Ndadala.
Ondangwa oya hota ondjokonona, noohango dhiitsali nadho omo kwa li hadhi hokanene momukunda oshikwiyu, okaholo kaamati taya ka hwa uushimba omOndagwa ha ka zalelwa, nonkene kehe omukwaniilongo ta ka longa uushimba omondangwa he endele. Moshikandjo omwa li wo mwa pewa elenga lyUukwambi Shitaatala sha Namangangala omukunda omivo dhontumba sho a li a tawuka mo mUukwambi, nOndangwa otaku hokololwa ya pewa Elenga Fillemon ya Shilongo omukwanyama opo ku kalekwe po onkalo pokati Kiilumbu nelelo lyoshilongo, sho taku popiwa kutya ando kasha ningilwe ando siku lumwe Tate Shuumbwa Elifas ando ina lala oshilongo, yo Ondonga ando ngiika nena kayina mukwaniilwa.mOdangwa namo omuna omahala giidhila, muna omikunda ihaadhi lalwa kushaangoka, ngaashi Etambo. Omapya ongaashi Iikwanadjaya mOkaloko, nEpya lya Kuku Namupala gwa Nangombe montananga, shampa we li lala ndyoka oto si, gamwe oha ga londelwa ngaa nagamwe ogena omazimo. Omuna wo Ekango lyAmushuna moka nale shampa wa tidhwa eto lyata mo, nenge owi isimpi owala oshoka ihamu landulilwa omuntu.
Kakele kiidhila, Ondangwa nando yina elenga oyina wo Omikunda ndhoka ihaa dhi kongwa nohadhi gandjwa owala kOmukwaniilwa ngo ta lele oshilongo mwene, omikunda ndhika ongaashi nee Onantsi, Okaloko, Onambango, nOnamungundo.