Oshikwiyu

August 29, 2013, 8:09 am


Oshikwiyu
Oshikwiyu ogwo gumwe gwomomikunda omikulu mOndonga, petameko elela ogwali gwa tseyika nedhina Okatunda, sha za ketumbulo Okatunda kAandonga, oshoka kamwali hamu lalwa epya kaakwiilongo. Okatunda oka kokolelwe po komusamene Shivute sha Kayamakuti ngoka a li omutakamithi gwoonkwandambi dhuuwa, okwali a pewa nduno Okatunda a shilikile po dhe nodha Mbala. Omukunda nguka Okatunda ogwa tsama edhina Oshikwiyu molwa omikwiyu odhindji dhali momukunda moka dhi momapya geli pu ga hamano omikwiyu ndhika shampa dhi imi okwali nee hadhi ithanenwa aantu yeye ya lye, okwa li ihe omukwiyu gumwe kohulo yomukunda guna omuzile omwaanawa oko haku thikilwa, ngoka taku hokololwa gwali omululu nohagu theta, opo pwa zi aantu ya luku nomusheko Oshikwiyu shoka oshilulu nedhina olya tsama omukunda.
Shivute sha Kayamakuti okwa landulwa kOmusamane Namulandu gwEnduwa. Namulandu okwali omusamane gwOmukwambi a teyika nawa mOndonga pethimbo lye oshoka okwali omuyamba, a li othimba yina ongodhi pomukwaniilwa.Maandja Namulandu okwali hamu hangw a oondjupa ndatu dhomalovu, oshoka okwa li nolukango halu tutilwa eloya, ko oko kwaza etumbulo tali ti “iilya yaandja Namulandu oyina omathinde taga pandekwa uutana.”Namulandu okwa tseyikila wo ombepo ye yokutalela po, ihaa popi mpo ta yi shampa we mu pula mpa tati ohati owala “otandi ka monena keelo.” Namulandu okwa landula ku Shimwe sha Nangolo dha Katambo ka Kwedhi omutekulu gwokombanda, ta landulwa ku Aron Iiyambo yIitula omuna gwa Marta gIikutsi omumwayina gwaNamulandu, Aron oye ta landulwa ku Teofelus Iikwa ngoka e guna sigo onena.
Oshikwiyu oshi igalala mondjokonona yOndonga oshoka omo kwali hamu dhanenwa Ohango yIitsali.
Tate Teofelus Iikwa okwa valelwa momukunda Oshikwiyu, ku Meme Anna ya Hao na Tate Mulunga gwIikwa. Osikola yongula okweyi hiti pOlukonda metonatelo lyoomestela Heinrich “Hai” Shuuya, Kaarina Simson noo Tate Toivo Salom, okwa pita Oseminary yuulongi kOngwediva momuvo 1976, okwa longo onga omukuluntusikola ku Iindangungu, nokUukwiyuwuushona, momuvo 1980 okwa ka longa kOranjemund sigo oshipundi shevululuko. Okwa lala omukunda gwaShikwiyu momuvo 1984. Monena okuli amushanga gwOmukwaniilwa, oye ishewe mwene gwomukunda Ondonga, na okuli ishewe ta tonatele Onamulunga A, nOnethindi.Tate Teofelus okwa hokana meme Aina Iikwa noyena omagano gaanona yaheyali.